Засгийн газар өнөөдөр хуралдаж, 2023 оныг авлигатай тэмцэх жил болгон зарлах тогтоолын төслийг баталжээ. Энэ талаар ХЗДХ-ийн сайд Х.Нямбаатар мэдээлэл өглөө.

Тэрбээр "Авлигатай тэмцэх жилийн хүрээнд хийх үйл ажиллагааг албан даалгавар хэлбэрээр хавсралтаар баталсан байгаа. ДНБ-ийг 55 орчим их наяд төгрөгт хүргэх боломжтой гэж тогтоол боловсруулах явцад тооцоолсон. Бидний дэвшүүлсэн зорилго биелсэн тохиолдолд нэг хүнд ноогдох ДНБ анх удаа 5000 ам.доллараас дээш гарах боломжтой юм билээ.

Тодруулбал, өнөөдөр манай улсын ДНБ 44-45 их наяд төгрөгт хэлбэлзэж байгаа. Харин далд эдийн засгийг ил болгох замаар 10 орчим их наядын өөрчлөлт гарна гэсэн өөдрөг хүлээлтийг 2023 онд тавьж байна. 55 орчим их наяд төгрөг болоход нэг хүнд ноогдох нь 5,000 ам.доллараас анх удаа босго давах боломж бүрдэнэ.

Авлигатай тэмцсэн улсуудын туршлагыг судалж үзсэний үндсэн дээр, 2023 оныг авлигатай тэмцэх жил болгох тогтоолыг боловсруулсан юм.

Авлигатай амжилттай тэмцсэн улсуудыг хараад байхад,

• Засгийн газар нь авлигатай тэмцэх чин хүсэл эрмэлзэлтэй эсэх нь хамгийн том хөдөлгөгч хүч болдог
• Хоёрт, олон нийтийн дэмжлэг байдаг
• Гуравт, чадварлаг хууль сахиулах тогтолцоо чухал.

2023 оныг авлигатай тэмцэх жил болгож зарласны хүрээнд дараах таван чиглэлийг даалгавар болгоно:

• Нэгт, шүгэл үлээх эрх зүйн тогтолцоог хуулийн хүрээнд бататгах
• Хоёрт нь "шүүр ажиллагаа" буюу нийтийн албанд ажиллаж байгаа, орлогоосоо давсан хэрэглээтэй албан тушаалтнуудыг "шүүрдэн" чөлөөлөх ажлыг зохион байгуулна. Мөрдөн шалгах ажиллагааг хүний эрхийн зөрчил, дутагдал гаргахгүйгээр эрчимүүлнэ.
• Гуравт нь "шувуу ажиллагаа"-г зохион байгуулна. Шалгуулалгүйгээр зугтсан, оргон зайлсан төрийн албан тушаалтнаар ажиллаж байсан этгээдүүдийг олон улсын цагдаагийн хамтын ажиллагааны хүрээнд эх нутагт нь авчрах чиглэлийн ажил юм.
• Дөрөвдүгээрт "Шилжүүлэн авах ажиллагаа" явуулна. Хууль бус хил давсан болон гэмт хэргийн замаар хураагдсан мөнгийг буцаан авчирч, дотооддоо төвлөрүүлэх ажиллагааг үүнд хамруулж ойлгоно.
• "Шилэн байх" ажиллагааг сүүлд нь дурдаж байна. Төрийн өмчит бүх компаниудыг шилэн болгохыг даалгаж байгаа. Төрийн болон орон нутгийн өмчит компанийн тухай хуулийг яаралтай батлуулж, батлагдсан хуулийн хэрэгжилтийг хангах, зөвхөн нээлттэй сонгон шалгаруулалтаар томилгоо хийх замаар 2023 оны эхний хагастаа бүх удирдлагыг шилэн болгох ажлыг даалгаж байна" гэлээ.