Жил бүр уламжлал болгон зохион байгуулагддаг “Монголын Тогтвортой Санхүүгийн Форум” арга хэмжээ 2024 оны 11-р сарын 27-ноос 29-ний өдрүүдэд “Монгол Улс – Ногоон хөгжлийг санхүүжүүлэх нь” сэдвийн хүрээнд зохион байгуулагдах гэж байна.

Жил бүрийн ТоС Форум нь бодлого боловсруулагчид, зохицуулагч байгууллагууд, хувийн хэвшлүүд болон иргэний нийгмийн төлөөллүүд зэрэг салбар бүрт ногоон хөгжлийн түүчээлэгчид зэрэгцэн сууж, хийж буй ажлууд, тулгамдаж буй бэрхшээлүүдээ нээлттэй хэлэлцэн, цаашдын алхмуудаа тодорхойлон, бүх талуудын хамтын ажиллагааг бэхжүүлэх, бодит үр дүн гаргах гүүр нь болдог билээ.

Энэ жилийн ТоС Форумын үндсэн хэсэг нь 11-р сарын 28-ны өдөр Төрийн ордонд зохион байгуулагдах бөгөөд яг одоо бидний улсаараа онцгойлон анхаарч буй хөдөө аж ахуйн салбарын ногоон шилжилт, эрчим хүчний хэмнэлттэй амины орон сууцны санхүүжилт болон ногоон санхүүжилтийн урсгалыг нэмэгдүүлэх нь зэрэг сэдвүүдийг тусгайлан хэлэлцэх юм.

Үндсэн форумын үйл ажиллагаанаас гадна банк, санхүүгийн салбарын мэргэжилтнүүд, жижиг дунд үйлдвэрүүдэд зориулсан олон улсын туршлагаас суралцах, мэдлэг мэдээллээ гүнзгийрүүлэх тусгайлсан сургалт, воркшопууд 11-р сарын 27, 29-ний өдрүүдэд зохион байгуулагдах ба эдгээр нь нөлөөллийн хөрөнгө оруулалт, биологийн олон янз байдлын санхүүжилт, уур амьсгалын тайлагнал зэрэг сэдвүүдийг хамарч буйгаараа онцлог болж байна.

Өдгөө 3 дахь жилдээ Монгол Улсын Ерөнхийлөгчийн ивээл дор зохион байгуулагдах гэж буй ТоС Форумыг Монгол Улсын Ерөнхийлөгчийн Тамгын газар, Монголын Тогтвортой Санхүүгийн Холбоо (ТоС Холбоо), ХААН банк (ТоС Холбооны 2024 оны Манлайлагч банк) болон Монгол Улс дахь Нэгдсэн Үндэстний Байгууллага хамтран бусад дотоодын болон олон улсын түнш байгууллагуудын дэмжлэгтэйгээр зохион байгуулж буй юм.

Сонирхсон хүн бүр дараах холбоосоор орж хөтөлбөр болон бүртгэлийн мэдээлэлтэй танилцана уу. Асууж, тодруулах зүйлс гарвал ТоС Холбоотой 72772002 дугаараар холбогдох боломжтой.

Форумын хөтөлбөр: https://drive.google.com/drive/folders/1Uy8wgjNtS7zDNlw-z9D8qQ-kOaFbQXFq

11-р сарын 28-ны Үндсэн форумын бүртгэл: https://docs.google.com/forms/d/e/1FAIpQLSfXEKEPEhLVUg8pgqaInKof9qrVA9qPyOfdTmZuB2-R9Rd_jw/viewform