“Дорнод Монголын хуурай хээрийн тогтвортой ландшафт, биологийн олон янз байдлын хамгаалал” төслийн дэмжлэгээр Хэнтий аймгийн Дадал, Норовлин сумын Эко клубын сурагчид хамтран 500 ширхэг моносны 1 настай суулгац, 600гр мойлны үрийг 2021 оны 10 сарын 2-ны өдөр Норовлин суманд шинээр баригдсан хүүхдийн эко зуслангийн талбайд тарилаа.

Хэнтий аймгийн Дадал сумын ЕБС-ийн эко клубын сурагчид өөрсдийн идсэн мойл жимсний үрийг сургуулийнхаа хашаанд жилийн хугацаанд тарьж, арчлан ургуулсан туршлагаа хөрш зэргэлдээ Норовлин сумынхаа байгаль хамгаалах эко клубын сурагчдад хуваалцаж, мойлны модны төгөл байгуулахаар ажлыг эхлүүлээд байна.

Энэхүү арга хэмжээний зорилго нь байгалаас түүж идсэн мойлны үрийг хаях биш, түүнийгээ ашиглан дахин монос модыг тарьж, ургуулан өөрсдийн нэрэмжит төгөл байгуулах замаар эко орчинг бүрдүүлэх, цаашлаад хүүхэд багачуудад байгальтай хэрхэн зөв харьцах, хамгаалах дадлыг суулгах, нөхөн сэргээх хүсэл эрмэлзэлийг өдөөх, ойн компанит ажилд тус сумдын хүүхэд, залуучуудыг татан оролцуулах, цаашлаад ойн тогтвортой менежментийг хэрэгжүүлэхэд түлхэц болох юм.

Мөн байгаль хамгаалах эко клубын гишүүдэд Дэлхийн байгаль хамгаалах сангийн зүүн бүсийн салбар, Онон Балжийн Байгалын Цогцолборт газрын хамгаалалтын захиргааны мэргэжилтнүүд моносны модыг хэрхэн тарих, арчлах талаар арга зүйн зөвлөгөө өгөв.

Сурагчдадаа тарьсан мод нь төгөл болж,

Сурсан мэдлэг нь эрдэм болоорой гэж хүсье.

Эх сурвалж: Дэлхийн байгаль хамгаалах сангийн  Монгол дахь хөтөлбөрийн газар