Монгол Улсын Ерөнхийлөгч У.Хүрэлсүх өнөөдөр (2022.09.19) АНУ-д болох НҮБ-ын Ерөнхий Ассамблейн 77-р хуралд оролцохоор эх орноосоо мордлоо. НҮБ-ын Ерөнхий Ассамблейн 77-р чуулган “Шийдвэрлэх мөч, харилцан хамааралтай сорилтуудад өөрчлөлт авчрахуйц шийдлүүд” сэдвийн дор болох юм.

Гадаад харилцааны сайд Б.Батцэцэгийн мэдээлснээр “Чуулганы Ерөнхий санал шүүмжлэл 101 улсын төрийн тэргүүн, 59 улсын Засгийн газрын тэргүүн, 3 улсын Шадар сайд, 28 улсын сайд оролцох төлөвтэй байна. Монгол Улсын Ерөнхийлөгч У.Хүрэлсүх Ерөнхий санал шүүмжлэлд оролцож, олон улсын харилцааны тулгамдсан асуудлаарх Монгол Улсын байр суурь, төр засгаас хэрэгжүүлж буй гадаад бодлогын зорилт, нийгэм, эдийн засгийн байдал, тулгамдаж буй бэрхшээлийг даван туулах бодлогыг танилцуулж, үг хэлнэ. Энэ үеэр НҮБ-ын Ерөнхий нарийн бичгийн дарга болон зарим орны төр, засгийн тэргүүнтэй уулзана.

Монгол Улсын Ерөнхийлөгч У.Хүрэлсүх НҮБ-ын Ерөнхий Ассамблейн 76 дугаар чуулганы Ерөнхий санал шүүмжлэлд үг хэлэх үеэрээ 2030 он гэхэд Монгол Улс тэрбумаар тоологдох хэмжээний мод тарьсан байх хөдөлгөөнийг эхлүүлэх гэж буй талаар мэдэгдсэн. Үүний дагуу Монгол Улсад "Тэрбум мод" хөдөлгөөн эхлүүлж, Ойн агентлаг байгуулж, иргэн бүр мод тарих санаачлагыг эхлүүлсэн билээ.